தமிழ்நாடு பா.ஜ.க தலைவர் அண்ணாமலை அண்மையில் அமெரிக்காவுக்கு சுற்றுப் பயணம் மேற்கொண்டார். இந்நிலையில் அண்ணாமலை மக்கள் நீதி மய்ய தலைவர் கமல்ஹாசனை விமர்சனம் செய்தார். இதையடுத்து இவற்றிற்கு பதிலடி கொடுக்கும் வகையில் அந்த கட்சியின் நிர்வாகி கவிஞர் சினேகன் பேசியதாவது “அண்ணாமலை சார் எங்கதலைவர் அமெரிக்காவில் அரசியல் பேசுவதாக கூறியிருக்கிறீர்கள். அவர் லாஸ் ஏஞ்சல்சிற்கு சொந்தகாசில் போனார். ஆனால் நீங்கள் எந்த பணத்தில் அமெரிக்கா சென்றிருந்தீர்கள் என்று எங்களுக்கு தெரியாது.
அவர் அமெரிக்காலிருந்து அரசியல் பேசுறார்னா?… இப்போ நீங்க எங்க இருந்து பேசுறீங்க?.. அதாவது, லாஸ் ஏஞ்சல்ஸ் அமெரிக்காவுல இருக்குன்னா, கலிபோர்னியா கரூருக்கு பக்கத்துலயா இருக்கு..? யார் வரலாறு பேசினாலும் அமைதியாக இருக்கீங்க. நாங்கள் வரலாறு பேசினால் மட்டும் எதற்காக இந்த ஆட்டம் ஆடுகிறீர்கள். அரசியலை விட்டு விட்டு தொழிலுக்கு சென்று விட்டார் என்கிறீர்கள். நீங்களும் தான் ஒருமுறை கூறி இருக்கிறீர்கள், அரசியல் சரியில்லை எனில் நான் ஆடு மாடு மேய்க்க போய்விடுவேன் என.
ஆனால் அவர் அரசியல் செய்வதோடு, தொழிலையும் பார்க்கிறார். ஏனெனில் அரசியல் கட்சி நடத்துவதற்கு பணம் தேவைப்படுகிறது. உங்களுக்கு கொட்டிக் கொடுப்பதுபோல மேலிருந்தும், கீழிருந்தும் கருப்பாகவும், வெள்ளையாகவும் கொட்டிக் கொடுக்க எங்களுக்கு யாருமில்லை. அவ்வாறு கொடுத்தாலும் நாங்கள் வாங்குபவர்கள் அல்ல. ஆகவே தான் தொழிலையும் பார்க்கிறோம், அரசியலும் செய்கிறோம். இனி ஒருவரை விமர்சனம் செய்வதற்கு முன்னதாக, பண்போடு பகுத்தாய்ந்து பேசுங்கள். அதுவே படித்தவர்களுக்கு நல்லது. எனவே ஆகாயத்தை பார்த்து எச்சில் துப்புவதற்கு ஆசைப்படாதீர்கள், அது உங்கள் முகத்தில் தான் விழும்’ என்று பதிலடி கொடுத்தார்.