தமிழக மின்வாரியத்தில் உள்ள ஒப்பந்த ஊழியர்களை நிரந்தரமாக்க வேண்டும் என்று தமிழக அரசுக்கு கோரிக்கை விடுத்துள்ளது.
மழையோ,வெயிலோ, புயலோ எந்த வகையான இயற்கை சீற்றங்கள் ஏற்பட்டாலும் களத்தில் இறங்கி வேலை பார்க்க கூடிய துறைகள் சில உண்டு. அவற்றில் மின்வாரியமானது அதிகம் கண்டுகொள்ளபடாத துறை என்று சொல்லலாம். அப்படி உயிரை பணயம் வைத்து பணியாற்றும் மின்வாரிய ஊழியர்களுக்கு எந்தவித பணி பாதுகாப்பும் இல்லை என்பதுதான் பெருந்துயரமாக உள்ளது. இந்தத் துறையில் ஒப்பந்த தொழிலாளர்களாக பல ஆண்டுகள் பணியாற்றுபவர்கள் சம்பள உயர்வு மற்றும் பணி நிரந்தரம் உள்ளிட்ட பல கோரிக்கைகளை முன்வைத்து போராட்டத்தில் ஈடுபட்டு வருகின்றனர்.
அப்போது அதிமுக ஆட்சியில் இருந்தபோதே தீவிர போராட்டங்களில் ஈடுபட்டு வந்த மின் ஊழியர்களை, மின் வாரியமோ அல்லது அரசோ கண்டுகொள்ளவில்லை. ஆனால் தற்போது திமுக நாங்கள் ஆட்சிக்கு வந்தால் மின்வாரியத்தின் கோரிக்கைகள் அனைத்தையும் நிறைவேற்றுவோம் என்று அறிவித்த நிலையில், தற்போது ஆட்சிக்கு வந்து 10 மாதங்கள் ஆகியும் எந்தவித கோரிக்கை நிறைவேற்றப்படவில்லை. இந்த நிலையில் சென்னை சேப்பாக்கத்தில் உள்ள மின்வாரிய அலுவலகம் அருகே தமிழ்நாடு மின் ஊழியர் மத்திய அமைப்பின் சார்பில் மின்வாரிய ஒப்பந்த பணியாளர்கள் இன்று ஆர்ப்பாட்டத்தில் ஈடுபட்டுள்ளனர்.
அப்போது அமைப்பின் மாநில பொதுச்செயலாளர் ராஜேந்திரன் கூறியுள்ளதாவது, தமிழ்நாடு மின்சார வாரியத்தின் மின் உற்பத்தி கட்டுமான பணிகள் மற்றும் விநியோக பகுதிகளில் ஒப்பந்த தொழிலாளர்கள் பல ஆண்டுகளாக பணியாற்றி வருகின்றன. கடந்த 2007ஆம் ஆண்டு ஏற்பட்ட ஒப்பந்தத்தின்படி 1998 ல் இருந்து 2003 வரை 5 ஆண்டுகள் தொடர்ச்சியாக பணியாற்றியுள்ள சுமார் 21,600 ஒப்பந்த தொழிலாளர்களை அடையாளம் கண்டு மஸ்தூர் என்ற பதவியில் பணி நியமனம் செய்யப்பட்டதாக தெரிவித்துள்ளது.
இதனை அடுத்து பாதுகாக்கப்பட்ட மின்உற்பத்தி நிலையங்களான அனல்,புனல், காற்றாலை ஆகிய இடங்களில் பணிபுரியும் ஒப்பந்த ஊழியர்களை பணி நிரந்தர படுத்தாமல் இருப்பது மின் வாரியத்திற்கு வருவாய் இழப்பை ஏற்படுத்தி வருகிறது.மேலும் ஒப்பந்த முறையே இந்த பகுதிகளில் இருக்கக் கூடாது என்று அரசாணை 950இன்படி சட்டம் உள்ளது. ஆனால் நிர்வாகமோ அந்த சட்டத்தை மீறி செயல்பட்டு வருகிறது. தமிழகத்தில் ஏற்பட்ட புயல் மற்றும் சென்னை பெரு வெள்ளம் போன்ற இயற்கை பேரிடர் காலத்தில் மின் தடைகளை சரிசெய்து குறுகிய காலத்தில் மின் வினியோகத்தை வழங்கி தமிழக அரசுக்கு பெருமை சேர்த்தவர்கள் ஒப்பந்த தொழிலாளர்கள் தான்.
ஆகவே இவர்களின் பங்கு மின்வாரியத்தின் அனைத்து அசைவுகளிலும், வளர்ச்சியிலும் முக்கியமாக கருதப்படுகிறது. எனவே தற்போதுள்ள திமுக அரசுதான் தேர்தல் அறிக்கையில் சொல்லப்பட்டுள்ளபடி, 10 ஆண்டுகளுக்கு மேல் பொதுத்துறை நிறுவனங்களில் பணியாற்றும் ஒப்பந்த ஊழியர்களை நிரந்தரம் செய்வோம் என்ற வாக்குறுதியை நிறைவேற்ற உடனடியாக நடவடிக்கை எடுக்க வேண்டும். மேலும் கடந்த 2018 ஆம் ஆண்டு ஏற்பட்ட முத்தரப்பு என்ற ஒப்பந்தத்தின் அடிப்படையில் ஒப்பந்த ஊழியர்களை அடையாளம் கண்டு அவர்களுக்கான தினக்கூலி 380 ரூபாயை வாரியமே நேரடியாக வழங்க வேண்டும் என்ற கோரிக்கைகளை வலியுறுத்தியுள்ளது. எனவே இதுகுறித்து தமிழக அரசும், வாரியமும் உடனடியாக நடவடிக்கை எடுக்க வேண்டும் என கேட்டுக் கொள்வதாக அவர் கூறியுள்ளார்.