மராட்டிய மாநிலம் நாக்பூர் மாவட்டம் சுபாஷ் நகரில் வசித்து வருபவர் சித்தார்த் சிம்னி (45)-ரஞ்சனா(42)தம்பதியினர். இந்த தம்பதியினருக்கு 16 மற்றும் 5 வயதில் இரண்டு மகள்கள் இருக்கின்றனர். இதனிடையில் யூடியூப் சேனல் நடத்திவரும் சித்தார்த் தன் மனைவி மற்றும் 2 மகள்களுடன் சென்ற மாதம் தஹல்கட் பகுதியிலுள்ள இஸ்லாமிய வழிபாட்டு தலத்திற்கு சென்றுள்ளார். அங்கு சென்று வந்த பிறகு 5 வயதான தன் 2-வது மகளின் நடவடிக்கைகள் மாறியதாக சித்தார்த் மூட நம்பிக்கை கொண்டுள்ளார். இதையடுத்து தனது 2-வது மகளுக்கு பேய் பிடித்து விட்டதாக சித்தார்த் நினைத்துள்ளார்.
அதன்பின் சித்தார்த் தனது மனைவி ரஞ்சனா மற்றும் உறவினர் பிரியா (வயது 32) ஆகியோருடன் இணைந்து தனது 5 வயது மகளுக்கு பேய் ஓட்டுவதற்காக சென்ற வெள்ளிக்கிழமை நள்ளிரவு மாந்திரீக செயலில் ஈடுபட்டுள்ளார். அப்போது பேய் ஓட்டுவதாக நினைத்து மாந்தீரிகம், பூஜை செய்தபோது அந்த 5 வயது குழந்தையிடம் பெற்றோர் கேள்விகளை கேட்டிருக்கின்றனர். அதற்கு அச்சிறுமி பதில் அளிக்காமல் அழுது கொண்டே இருந்ததால் அவரை பெற்றோர் கடுமையாக அடித்துள்ளனர். அதாவது சிறுமியின் கண்ணத்திலும், உடலிலும் கடுமையாக அடித்துள்ளனர். இந்நிலையில் பெற்றோர் கடுமையாக அடித்ததில் சிறுமி அங்கேயே மயங்கி விழுந்துள்ளார்.
அதன்பின் தன் மகளை பெற்றோர் சனிக்கிழமை அதிகாலை இஸ்லாமிய வழிபாட்டு தலத்திற்கு கொண்டு சென்றுள்ளனர். பின் சிறுமியை அருகேயுள்ள அரசு மருத்துவமனையில் அனுமதித்துவிட்டு பெற்றோர் அங்கிருந்து சென்றுவிட்டனர். இதனிடையில் பெற்றோரின் நடவடிக்கையால் சந்தேகமடைந்த மருத்துவமனை காவலாளி அவர்கள் வந்த காரின் எண்ணை புகைப்படம் எடுத்துள்ளார். அதேநேரம் மருத்துவமனையில் அனுமதிக்கப்பட்ட சிறுமியை டாக்டர்கள் பரிசோதனை நடத்தினர்.
அப்போது பரிசோதனையில் குழந்தை ஏற்கனவே உயிரிழந்துவிட்டது என்பது தெரியவந்தது. இது தொடர்பாக தகவலறிந்து மருத்துமனைக்கு விரைந்து வந்த காவல்துறையினர் விசாரணையை தொடங்கினர். அத்துடன் மருத்துவமனை காவலாளி எடுத்த காரின் புகைப்படம் மற்றும் எண்ணை வைத்து விசாரணையை தீவிரப்படுத்திய காவல்துறையினர் சிறுமியின் தந்தை சித்தார்த் சிம்னி, தாய் ரஞ்சனா, அவரது உறவினர் பிரியா ஆகிய 3 பேரையும் கைது செய்தனர். இந்த சம்பவம் குறித்து காவல்துறையினர் தொடர் விசாரணை நடத்தி வருகின்றனர்.