முதல்வர் மு.க ஸ்டாலின் பாதுகாப்பாக அவருடன் 12 கான்வாய் வாகனங்கள் செல்வது வழக்கம். இந்த வாகனங்களினால் ஒரு சில நேரங்களில் போக்குவரத்து நெரிசல் ஏற்படுவதாக புகார் எழுந்து வந்தது. அதன்படி அக்டோபர் 1ஆம் தேதி நடிகர் திலகம் சிவாஜியின் பிறந்த நாள் கொண்டாடப்பட்ட போது சிவாஜி மணிமண்டபத்தில் முதல்வர் ஸ்டாலின் மரியாதை செலுத்த சென்றபோது அந்த வழியாக சென்ற நீதிபதியின் வாகனத்தை 25 நிமிடங்களுக்கு மேலாக காவல்துறையினர் நிறுத்தி வைத்ததால் சென்னை உயர்நீதிமன்றம் கண்டனம் தெரிவித்திருந்தது.
இதனையடுத்து முதல்வரின் பாதுகாப்புக்காக செல்லும் கான்வாய் வாகனங்கள் எண்ணிக்கை குறைக்க முடிவு செய்யப்பட்டுள்ளது. முதல்வர் ஸ்டாலின் அறிவுறுத்தலின் பேரில் நடத்தப்பட்ட கூட்டத்தில் இந்த முடிவு எடுக்கப்பட்டு கான்வாய் வாகனங்களின் எண்ணிக்கை 6 ஆக குறைக்கப்பட்டுள்ளது. மேலும் முதல்வரின் கான்வாய் வாகனங்கள் செல்லும் போது பொதுமக்கள் பாதிக்கப்படும் வகையில் போக்குவரத்து நெரிசல் ஏற்படுத்த வேண்டாம் என்று அறிவுறுத்தப்பட்டுள்ளது. போக்குவரத்தை நிறுத்தாமல் மற்றவர்களுடன் இணைந்து முதல்வர் வாகனங்களும் செல்லும் வகையில் ஏற்பாடு செய்ய திட்டமிட்டுள்ளதாகவும் தகவல் வெளியாகியுள்ளது.