பிரபல தமிழ் நடிகர் விஜய் சேதுபதி தன்னுடைய எதார்த்தமான நடிப்பில் ரசிகர்களை தன் பக்கம் ஈர்க்கும் திறமையுள்ளவர். இவர் நடித்த பல திரைப்படங்கள் வெற்றியடைந்துள்ளன. இவருக்கு என்று தனி ரசிகர் பட்டாளமே உள்ளது. இந்நிலையில் சென்னை நுங்கம்பாக்கத்தில் உள்ள தனியார் கல்லூரியில் நடைபெற்ற நிகழ்ச்சி ஒன்றில் சிறப்பு விருந்தினராக நடிகர் விஜய் சேதுபதி கலந்து கொண்டார். அப்போது மாணவர்களிடையே பேசிய அவர், இந்த உலகில் யாரும் யாரிடமும் தோற்றுப் போவதில்லை. யாரும் யாரையும் வெற்றி கொள்வதுமில்லை. அது அந்த சமயத்தில் நடக்கும் ஒரு சிறிய நாடகம் மட்டும்தான்.
அறிவை மேம்படுத்துவதற்கு மிகவும் முக்கியமானது கேட்பது. பிறர் பேசுவதை முதலில் நன்றாக கவனித்துக் கேளுங்கள். பள்ளி கல்லூரிகள் எல்லாம் நமக்கு அதைத்தான் சொல்லிக் கொடுக்கின்றன. நாம் படிக்கும் பாடங்கள் எல்லாம் யாரோ ஒருவர் படித்து அதை புரிந்து கொண்டு மற்றவர்களுக்கு பாடமாக ஆக்கியதுதான். அவ்வாறு நாம் படிக்கும் பாடங்களை நம் அறிவைக் கொண்டு மதிப்பீடு செய்ய வேண்டும். அதற்கு பெயர் தான் பகுத்தறிவு. அது கடவுளாக இருந்தாலும் சரி மனிதனாக இருந்தாலும் சரி அல்லது யாராக இருந்தாலும் சரி கருத்தை பாருங்கள் கருத்து சொன்னவரை பார்க்காதீர்கள் என்று கூறியுள்ளார்.