பிரபல நடன இயக்குனர் பிருந்தா மாஸ்டர் இயக்கத்தில் உருவாகி வரும் இரண்டாவது திரைப்படம் தஸ்க். இந்த படத்தை எச்.ஆர்.பிக்சர்ஸ் சார்பில் ரியா சிபு தயாரித்துள்ளார். இந்தப் படத்தில் ஹிருது ஹரூண், சிம்ஹா, ஆர்.கே. சுரேஷ், முனிஸ்காந்த் உள்ளிட்ட பலர் நடித்துள்ளனர். சாம்.சி.எஸ். இசையமைத்திருக்கும் இப்படத்தின் ஒளிப்பதிவு பிரியேஸ் குருசாமி மேற்கொண்டு உள்ளார். இந்த படத்தின் கதாபாத்திர அறிமுக வீடியோ வெளியீட்டு விழா சென்னையில் உள்ள பிரபல திரையரங்கில் திரை பிரபலங்கள் முன்னிலையில் நடைபெற்றது. இந்த விழாவில் சிறப்பு விருந்தினராக ஆர்யா, இயக்குனர்கள் கே.பாக்யராஜ், கௌதம் வாசுதேவ் மேனன், ராதாகிருஷ்ணன் பார்த்திபன், தேசிங்கு பெரியசாமி, ரவியரசு, குஷ்பு பூர்ணிமா பாக்யராஜ், கலா மாஸ்டர் ஆகியோர்கள் கலந்து கொண்டனர்.
இந்நிகழ்ச்சியில் பேசிய ஆர்யா, பிருந்தா மாஸ்டருடன் பல படங்களில் பணிபுரிந்துள்ளேன். அவருடைய நிஜ கதாபாத்திரம் ஆக்ஷனோடு தான் இருக்கும். அது இந்த படத்தில் பிரதிபலித்து இருக்கிறது. பவர்ஃபுல்லான ஆக்ஷன் காட்சிகள் படத்தில் இருக்கிறது. படத்தின் டீசரில் ஆக்ஷன் காட்சிகள் சிறப்பாக இருக்கிறது. தயாரிப்பாளர் சிபு எல்லாவற்றிலும் தனித்துவத்தை எதிர்பார்க்கும் ஒருவர். இந்த படம் அவர் நினைத்தது போல் இருக்கும். இந்த படத்திற்காக தான் ஆவலோடு காத்திருக்கிறேன். ஒட்டுமொத்த பட குழுவிற்கு எனது வாழ்த்துக்கள் என்று கூறினார். அதனை தொடர்ந்து பேசிய இயக்குனர் கௌதம் மேனன், பிருந்தா ஒரு மான்ஸ்டர், என்னுடைய அனைத்து படங்களிலும் பாடல்கள் சிறப்பாக வர அவரும் ஒரு காரணம். வேட்டையாடு விளையாடு படத்தில் கற்க கற்க பாடலில் வரும் ஆக்ஷன் பகுதிகளை அவர்தான் இயக்கினார். அதனால்தான் அவர் ஆக்ஷன் திரைப்படத்தை உருவாக்குகிறார் என்பதில் எனக்கு எந்த ஆச்சரியமும் இல்லை. அவர் கண்டிப்பாக பெரிய இடத்தை தொடுவார். மேலும் படக்குழுவுக்கு எனது வாழ்த்துக்கள் என்று தெரிவித்துள்ளார்.