சினிமா மற்றும் விளையாட்டு போன்ற பல துறைகளில் பிரபலமாக இருக்கும் நபர்களை போல தங்களின் நடை உடை பாவனைகளை மாற்றி வலம் வரும் சில ரசிகர்கள் இருந்து வருகின்றனர். இன்னும் சிலர் ஒரு படி மேலே சென்று தங்களை கவர்ந்த பிரபலங்களை போல் அச்சு அசலாக அப்படியே மாற வேண்டும் என்று நினைத்து அதிகம் மெனக்கெடுவதும் அவ்வப்போது நடைபெற்று வருகிறது. அவ்வாறு பிரேசிலை சேர்ந்த மாடல் அழகி ஒருவர் உலகப் புகழ் பெற்ற அமெரிக்க மாடல் அழகியாக கிம் கர்தாஷியன் உருவ அமைப்பை பெறுவதற்காக கடந்த 12 வருடங்களில் 40 அறுவை சிகிச்சை மேற்கொண்டு இருக்கிறார்.
ஜெனிபர் பாம் லோனா என்ற அந்த மாடல் அழகி தன்னுடைய 17 வயதில் இருந்து கிம் கர்த்தாஷியனைப் போல் மாறுவதற்காக அறுவை சிகிச்சைகளை செய்திருக்கின்றார். அப்படி 12 வருடங்களில் சுமார் 4 கோடி செலவில் 40க்கும் மேற்பட்ட அறுவை சிகிச்சைகளை செய்திருக்கின்றார். இதனால் ஜெனிபர் பாம்பலோனா பெருமளவில் பிரபலமாகியுள்ளார். சமூக வலைத்தளங்களில் அவரை பின் தொடர்வோரின் எண்ணிக்கை லட்சங்களை கடந்திருக்கிறது. ஆனால் ஒவ்வொரு தடவையும் நடந்த அறுவை சிகிச்சையில் ஏற்பட்ட ஏதாவது ஒரு குறைபாடு காரணமாக ஜெனிபர் இயற்கை அழகு மாறி வித்தியாசமாக உருவ அமைப்பிற்கு மாறியுள்ளார்.
ஒரு காலகட்டத்தில் தான் அறுவை சிகிச்சைகளுக்கு அடிமையானதை உணர்ந்த அவர் தான் மகிழ்ச்சியாக இல்லை என்பதை வெளிப்படுத்தியுள்ளார். அதனால் மீண்டும் இயற்கையான தனது தோற்றத்தை பெற விரும்பிய ஜெனிபர் அதற்காக சிகிச்சையில் இறங்கி இருக்கின்றார். மேலும் உருவத்தை மாற்ற செய்ய அறுவை சிகிச்சைகள் எந்த அளவிற்கு ஆபத்தானது என்பது பற்றி சமூக வலைத்தளங்களில் தனது புகைப்படங்களுடன் பரப்புரை செய்து வருகின்றார்.